Кога имаме желба да го отстраниме вишокот на килограми, најчесто фокусот е насочен на соодветна правилна исхрана и физичка активност. Меѓутоа, се заборава на еден многу важен фактор – квалитетниот сон.
Моменталните упатства на Американската национална фондација за спиење препорачуваат 7 до 9 часа сон секоја ноќ. Тие наведуваат дека честото ограничување на сонот на помалку од 6 часа може да го загрози здравјето и општата добросостојба.
Имено, едно од објаснувањата за сѐ пократкото спиење на возрасната популација е поврзано со општествените предизвици на брзиот модерен начин на живот. Вклучувајќи го и времето на работното место поминато пред различни екрани. Тоа придонесува во можното намалување на траењето на спиењето, а со тоа и нарушување на биолошкиот ритам.
Важноста на квалитетниот сон
Сакате да изгубите повеќе масно ткиво? Заборавете на волшебните напитоци за “согорување калории“ или на популарните ригорозни диети. За почеток обезбедете си 8 часа квалитетен сон и на тој начин полесно ќе си ја остварите целта.
Дали знаевте дека околу третина од нашиот живот го поминуваме во спиење?
Најважната причина зошто поминуваме толку значаен дел од животот во кревет е тоа што сонот е важен за секојдневното функционирање, физичкото и менталното здравје. Често не сме свесни за важноста на спиењето и влијанието на недостатокот на сон врз секојдневниот живот.
Здравствени импликации
Интересно е тоа што многу луѓе нарушувањата во спиењето ги сметаат за нормални. А, не за патологија што може да го загрози нивното здравје. Во таа смисла, многу научни истражувања потврдуваат дека лошото спиење во многу случаи е поврзано со широк опфат на здравствени проблеми. Докажано е дека луѓето што не спијат доволно имаат поголем ризик од болести на срцето и крвните садови, како и мозочен удар. Ове е во споредба со оние кои спијат 7-8 часа секоја ноќ.
Понатаму, во испитување што било спроведено на популација од здрави мажи, ограничувањето на спиењето на 4 часа по ноќ, 6 ноќи една по друга, предизвикало симптоми на предијабет. Овие симптоми се повлекле по една недела зголемено треање на спиењето.
Лошите навики во спиењето исто така се силно поврзани со негативните влијанија на глукозата во крвта кај општата популација. Се покажало дека луѓето што спијат помалку од 6 часа на ноќ се со зголемен ризик од дијабет тип 2. Исто така, менталното здравје, особено депресијата, е силно поверзана со лошиот квалитет на спиење и нарушувањата во спиењето. Се проценува дека 90% од луѓето со депресија се жалат на квалитетот на спиењето.
Можеби една од најнеочеуваните нуспојави на неспиењето е и непосакуваното зголемување на телесната тежина. Се прашувате зошто и како? Во продолжение го има објаснувањето.
Како сонот влијае на внесот на калории?
Една од теориите е дека ограничувањето на сонот може да предизвика нарушување во регулацијата на хормоните лептин и грелин, што доведува до зголемување на внесот на енергија. Сепак, објаснувањето што се покажало поверојатно всушност е од хедонистичка природа.
Овој хедонистички ефект е докажан во контролирано испитување во кое периодично лишување од сон резултирало со позначајно активирање на невроните како одговор на стимулите на храна. Особено во областите на мозокот поврзани со наградување.
Овие откритија сугерираат дека пократкиот сон ја зголемува мотивацијата за барање храна како награда.
Понатаму, во систематска ревизија и мета-анализа спроведена во 2017 година, научниците откриле дека испитаниците кои спиеле помалку имале зголемен внес на енергија од дури 385kcal на ден. Тоа е калориска вредност еквивалентна на еден поголем чизбургер.
За луѓето кои често го скратуваат времето на спиење, овој факт може да доведе до прекумерно внесување и неколку илјади калории во даден месец. Тоа би довело до значително зголемување на масно ткиво. Исто така, во споменатата студија, дошло и до промена во дистрибуцијата на макронутриенти така што испитаниците со намалено време на спиење генерално конзумирале повеќе маснотии, а помалку протеини.
Како заклучок, веројатно наједноставниот чекор што можете да го направите за намалување тежина, но и грижа за сопственото здравје во целина, е да ги подобрите вашите навики за спиење. Тоа значи да целите кон оптимални 8 часа сон. За многумина, овој пристап е потенцијално ефективна алатка за губење на несакани килограми. Се разбира, не треба да се заборави да се прилагоди исхраната и да се зголеми физичката активност.
