Предменструален синдром, ПМС, е термин кој опфаќа широк спектар на симптоми што жената може да ги доживее една до две недели пред менструацијата.
Истражувањата покажуваат дека дури 80% од жените во репродуктивниот период доживуваат некои од симптомите на ПМС, од кои најчести се грчеви во стомакот, надуеност, главоболки, болки во грбот и осетливост на градите. Но, исто така и анксиозност, депресија, нервоза, слаба концентрација и промени во расположението.
Научниците долго време се обидуваа да ја откријат причината за ПМС, а една од нив е можноста да биде нарушено нивото на серотонин поврзан со депресија, промени во апетитот и отежнато спиење.
Нивото на серотонин кај жени кои имаат тежок ПМС се смета дека е помало околу десет дена пред менструацијата.
Од друга страна, резултатите од неодамнешните истражувања покажуваат дека причината за овој непријатен синдром може да биде состојба предизвикана од биомаркер наречен Ц – реактивен протеин (ЦРП).
Ова откритие всушност сугерира дека наједноставниот начин за лекување на ПМС може да биде ублажување на воспалението со природни методи, како што се едноставни промени во навиките во исхраната.
Мали промени во исхраната можат да ги ублажат симптомите
Многу студии ги проучуваат придобивките од правилната исхрана со цел да се спречат физичките и менталните симптоми на ПМС.
Потребно е да внесувате поголемо количество на овошје и зеленчук бидејќи е богато со антиоксиданси кои го намалуваат воспалението. Одличен избор се бобинките, пиперки, агруми (цитрусни овошки), брокула, спанаќ и кељ.
Покрај зголемениот внес на зеленчук и овошје, препорачливо е да се консумираат зрна и мешунки како грав, грашок, леблебија и леќа, но и храна богата со есенцијални омега – 3 масни киселини, како што се риба, ореви и семки.
Омега – 3 масните киселини имаат силни антиинфламаторни својства. Резултатите од една студија покажаа дека нивниот внес, во комбинација со витамин Б12 може значително да ги намали симптомите на менструални грчеви.
Доколку имате навика секојдневно да пиете од 2,5 до 3 литри вода, тоа е одлично. Но, доколку ова не го практикувате обидете се да пиете поголемо количество вода почнувајќи од една недела пред менструацијата до една недела по менструацијата.
Покрај тоа, би било добро да се намали внесот на натриум во исхраната. Ова е со цел за да се спречи надуеност и задржување на водата во организмот.
Препорачливо е да се избегнуваат шеќери кои придонесуваат за создавање на воспалителна состојба, но и алкохол, мрсна храна и кофеин.
Кофеинот е поврзан со напнатост и нежност на градите. Истовремено го стимулира централниот нервен систем и може да предизвика вознемиреност и нервоза. Покрај тоа, кофеинот е и диуретик и може да предизвика загуба на важни нутриенти.
Додатоци во исхраната кои е препорачливо да ги внесувате за пред и за време на циклусот
Калциум и витамин Д
Се смета дека предменструалниот синдром може да укаже на појава на остеопороза предизвикана од слаб внес на калциум.
Исто така, докажано е дека земањето калциум помага во ублажување на симптомите на ПМС, како што се депресија и замор.
Затоа препорачуваме да се обезбеди потребната количина од 1000 мг калциум дневно. Оваа количина е содржана во три големи чаши млеко, а може да се земе и како додаток во исхраната.
Во комбинација со калциум, се препорачува да се земе витамин Д. Тој има улога во апсорпцијата на калциум и намалување на воспалението.
Покрај тоа, неодамнешните истражувања покажуваат дека може да помогне во намалување на грчевите во менструалниот циклус.
Магнезиум и витамин Б6
Земањето магнезиум и витамин Б6 може да помогне при симптоми на ПМС. Може да го намали чувството на анксиозност, надуеност и зголемена желба за храна.
Треба да се земаат во комбинација бидејќи витаминот Б6 помага во искористувањето на магнезиумот во организмот.
Витамин Е
Еден од најчестите симптоми на предменструален синдром се затегнатите и болни гради,. Се верува дека земањето витамин Е може да биде корисно во оваа состојба.
