Ишијас-третман и превенција

Ишијас-третман и превенција

Третман на ишијас

Акутната болна фаза бара итна терапија поради сериозноста на болката, што во многу случаи е неподнослива. Најефективната мерка е инфилтрација на паравертебралните мускули во близина на болните точки со аналгетици и кортикостероиди. По инфилтрација, лумбалниот регион треба да се загрева со топол термофор. Корисна е и употреба на мускулни релаксанти со седативно дејство. Често се даваат инјекции со витамин Б1, Б6 и Б12.

Во акутната фаза, најкорисно е да се постави пациентот во лежечка положба со натколениците во вертикална и потколениците во хоризонтална положба – позиција на Вилијамс.

Положба на Вилијамс

Откако болката ќе се смири, се применува физикална терапија со цел зајакнување на паравертебралните мускули. Пациентот треба да се советува да:

  • спие на рамен кревет,
  • самиот спроведува соодветни вежби,
  • избегнува кревање товар при исправување, и
  • не прави нагли движења.

Ако има нарушување на функцијата  сфинктерот и потенцијата, значителна мускулна слабост и атрофија, знаци на компресија на ‘рбетниот мозок или долготрајна болка, потребна е хируршка интервенција.

Колку трае ишијасот?

Болката што произлегува од ишијас може да биде акутна или хронична.

Епизодата на акутна болка може да трае една до две недели и обично потоа целосно се повлекува. Епизоди на акутна болка може да се повторат подоцна.

Акутната болка може да се претвори во хронична болка, а при тоа болката е доста честа и тоа е синдром кој може да трае цел живот. Сепак, хроничната болка е обично поблага од акутната.

Лекарите што ви требаат при лекување и дијагностицирање
  • физијатар
  • ортопед
  • невролог
  • неврохирург
  • ревматолог
Превенција

Иако не е секогаш можно да се спречи болка во лумбосакралниот дел, постојат ефективни начини да го заштитите грбот и да ги намалите проблемите со болка или рекурентните епизоди на ишијас:

  • Редовно вежбајте. Кога вежбате, бидете внимателни, најдобро е да се консултирате со физиотерапевт или лекар за тоа кои вежби се добри за вас и како нема да се повредите. Вежби кои се важни за добро држење на телото се оние кои ги зајакнуваат мускулите на стомакот и долниот дел на грбот.
  • Обрнете внимание на држењето на телото додека седите. Седнете исправено, со колковите и колената во иста линија. Можете да ставите помала перница помеѓу потпирачот за грб и долниот дел на грбот за да ја одржите природната крива на ‘рбетниот столб
  • Одржувајте добра координација на телото. Кога кревате нешто, држете го грбот исправен, а товарот што го носите поблиску до вашето тело, избегнувајте истовремено кревање и вртење на ‘рбетот.

    АМ

Коментари