Стресот е неизбежен дел од нашето секојдневие поради брзиот начин на живот, но особено е зголемен кога сме изложени на појави како пандемија. Во овие ситуации сме под засилен стрес што може да биде повод за многу болести и тешки здравствени состојби. Има многу стратеги кои ни даваат моќни алатки во борбата против стресот, што можеби не можеме да го избегнеме но, можеме да го намалиме и полесно да управуваме со него. Една од нив е храната што ја конзумираме.
Сложени јаглехидрати
Јаглехидратите го поттикнуваат мозокот да произведува серотонин. За постојано да го имаме овој хормон на среќата, најдобро е да јадеме сложени јаглехидрати на кои им е потребно подолго време да се сварат. Леб од цели зрна, интегрален ориз или тестенини и овесни снегулки се одлични извори каде може да се најдат ваквите јаглехидрати. Тие помагаат и во стабилизирање на нивото на шеќер во крвта и одржување на рамнотежата во целиот организам.
Портокали
Портокалите се богати со витаминот Ц, а според научни студии, овој витамин може да го намали нивото на хормонот на стрес преку зајакнување на имунолошкиот систем. Во едно истражување, луѓето со покачен крвен притисок и високо ниво на кортизол (хормон на стресот) по земањето витамин Ц можеле побрзо да завршат стресна задача во споредба со оние кои при истата состојба не земале витамин Ц.
Спанаќ
Раните знаци на недостиг на магнезуим во организмот се слабост, депресија, главоболка, губење на апетитот, мачнина и несоница. Дневните потреби за магнезуим можете да ги задоволите со две шолји зготвен спанаќ.
Покрај спанаќот, и останатиот зелен листест зеленчук е добар извор на магнезиум. Послужете го со филети од лосос – храна која исто така го содржи овој важен минерал.
Риба
Масните киселини омега 3 што се наоѓаат во рибата како лосос и туна, може да го спречат растот на хормонот на стрес и може да помогнат во заштитата од болести на срцето и крвните садови, депресија и предменструален синдром (ПМС).
Црн чај
Пиењето црн чај може да ви помогне во побрзо опоравување од стресни случувања. Едно истражување ги споредило луѓето кои пиеле четири шолји чај дневно во текот на шест недели, со луѓе кои пиеле друг напиток. Кај оние кои пиеле црн чај се покажале пониски нивоа на хормонот на стрес и посмирено однесување по стресни ситуации во однос на другите.
Јаткасти плодови
Јаткастите плодови се добар извор на здрави масти. Рака ф’стаци, ореви или бадеми секој ден може да делува против воспаленија, да придонесе во намалување на холестеролот, да ја намали веројатноста од појава на дијабет тип 2 и да заштити од последиците на стресот. Сепак, не претерувајте, бидејќи јаткастите плодови се богати со калории. На пример, со една рака бадеми, внесувате околу 160kcal.
Авокадо
Еден од најдобрите начини за намалување на високиот крвен притисок е доволен внес на калиум, а половина авокадо има повеќе калиум отколку средно голема банана. Подгответе си гвакалмоле од авокадо и ќе добиете одличен извор на оброк со висок удел на здрави масти.
Физичка активност
Иако овде зборуваме за храна што придонесува за подобро расположение, мора да се напомене и важноста на физичката активност во борбата против стресот.
Вежбањето ја засилува циркулацијата на кислород и го поттикнува излачувањето на ендорфин, хормон што исто така го крева расположението. Во ситуации како оваа, за вежбање искористете го просторот на вашиот дом, приклучете се на група за онлајн тренинзи осмислени од експерти и на тој начин придонесете кон опуштање на телото, но и одржување на здравјето.
